Қазақстан Республикасының Қаржылық мониторинг агенттігі

Қазақстан Республикасының Қаржылық мониторинг агенттігі — Қазақстан Республикасының Президентіне тікелей бағынатын және есеп беретін, қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл саласында, сондай-ақ, Қазақстан Республикасының заңнамасында осы органның құзырына жатқызылған экономикалық және қаржылық құқық бұзушылықтардың алдын алу, оларды анықтау, жолын кесу, ашу және тергеп-тексеру бойынша басшылықты жүзеге асыратын мемлекеттік орган.

Қазақстан Республикасының Қаржылық мониторинг агенттігі
Жалпы мағлұмат
Мемлекет	Қазақстан
Құрылған уақыты	28 қаңтар 2021
Мекемені басқарады	Қазақстан Республикасының Президентіне тікелей бағынады және есеп береді
Штаб-пәтері	Астана қаласы, Бейбітшілік көшесі, 10
Төрағасы	Жанат Элиманов
Төрағаның бірінші орынбасары	Ұлан Раисов
Ресми сайты
gov.kz/memleket/entities/afm

Тарихы

1998 жылы Қаржы министрлiгiнiң Салық полициясы департаментi мен Iшкi iстер министрлiгiнiң Экономикалық полиция департаментiнiң базасында Қаржы министрлiгiнiң Салық полициясы комитетi құрылды. Комитеттің негізгі міндеттеріне салық төлеуден жалтарғандар мен басқа да экономикалық қылмыстарға қарсы күресті іске асыру жатқызылды.

2001 жылы Мемлекеттік кіріс министрлігінің Салық полициясы комитеті және Салық полициясы академиясының мүлкі мен функциялары беріліп, Қаржы полициясы агенттігі құрылды. Агенттікке экономика және қаржы саласындағы құқық бұзушылықтардың алдын алу, анықтау және жолын кесу жөніндегі міндеттерді орындау жүктелді.

2003 жылы Қаржы полициясы агенттігіне Ішкі істер министрлігінің экономикалық және сыбайлас жемқорлық қылмыстарды анықтау және тергеу жөніндегі функциялары беріліп, Экономикалық және сыбайлас жемқорлық қылмысқа қарсы күрес жөніндегі агенттігі (Қаржы полициясы) құрылды.

2014 жылы Экономикалық және сыбайлас жемқорлық қылмысқа қарсы күрес жөніндегі агенттігі таратылып, оның экономикалық және қаржылық қылмыстар мен құқық бұзушылықтардың алдын алу, оларды анықтау, жолын кесу, ашу және тергеу жөніндегі функциялары Қаржы министрлігіне берілді.

Президенттің 2021 жылғы 28 қаңтардағы № 501 Жарлығымен Қаржы министрлігінің қылмыстық жолмен алынған кірістерді заңдастыруға және терроризмді қаржыландыруға қарсы күрес, сондай-ақ экономикалық және қаржылық қылмыстар мен құқық бұзушылықтардың алдын алу, анықтау, жолын кесу, ашу және тергеу салалардағы өкілеттіктері беріліп, Қаржылық мониторинг агенттігі құрылды. Қаржы министрлігінің құрамындағы Қаржы мониторингі комитеті таратылды.

Міндеттері

1) қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл саласындағы бірыңғай мемлекеттік саясатты іске асыру;

2) Қазақстан Республикасының заңнамасымен осы органның жүргізуіне жатқызылған экономикалық және қаржылық құқық бұзушылықтардың алдын алу, анықтау, жолын кесу, ашу және тергеп-тексеру;

3) қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл салаларында бірыңғай ақпараттық жүйе құру және республикалық деректер базасын жүргізу;

4) қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл саласында шет мемлекеттердің құзыретті органдарымен өзара іс-қимылды және ақпарат алмасуды жүзеге асыру;

5) қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл, мемлекеттік органдардың осы бағыттағы қызметін үйлестіру;

6) қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері бойынша халықаралық ұйымдарда Қазақстан Республикасының мүдделерін білдіру;

7) Агенттіктің жүргізуіне жатқызылған мәселелер бойынша Қазақстан Республикасының заңнамасына сәйкес халықаралық ынтымақтастықты жүзеге асыру;

8) Қазақстан Республикасының заңдарында және Президентінің актілерінде айқындалатын өзге де міндеттер.

Құрылымы

Жетекшілігі

1. Қазақстан Республикасы Қаржылық мониторинг агенттігінің Төрағасы — Элиманов Жанат Қалдыбекұлы
2. Қазақстан Республикасы Қаржылық мониторинг агенттігі Төрағасының бірінші орынбасары — Раисов Ұлан Ермұханұлы
3. Қазақстан Республикасы Қаржылық мониторинг агенттігі Төрағасының орынбасары — Бижанов Қайрат Жақияұлы
4. Қазақстан Республикасы Қаржылық мониторинг агенттігі Төрағасының орынбасары — Елемесов Жеңіс Фарахатұлы
5. Аппарат басшысы — Сағындықов Әмір Абайұлы

Департаменттері

• Қаржылық мониторинг субъектілерімен жұмыс департаменті
• Қаржылық мониторинг департаменті
• Цифрландыру департаменті
• Құқықтық қамтамасыз ету департаменті
• Тергеу департаменті
• Жедел департамент
• Превенция және талдау әзірлемелері департаменті
• Жеке қауіпсіздік департаменті
• Стратегия және жедел басқару департаменті
• Кадр жұмысы департаменті
• Әкімшілік департаменті
• Ішкі аудит қызметі

Басқармалары

• Бұқаралық ақпарат құралдарымен жұмыс басқармасы
• Криминалистика басқармасы

Қарамағындағы мекемелер

• Облыстар мен Алматы, Астана, Шымкент қалалары бойынша экономикалық тергеп-тексеру департаменттері
• Қаржылық мониторинг агенттігінің Кинологиялық орталығы
• "AML ACADEMY" Қаржылық мониторинг академиясы" АҚ

Басшылығы

№	Аты-жөні	Қызмет еткен кезеңі	Лауазым атауы
1	Әбілқайыр Бақтыбайұлы Сқақов	2019 жыл 25 сәуір — 2020 жыл 27 қаңтар	Қаржы министрлігі Қаржы мониторингі комитетінің төрағасы
2	Жанат Қалдыбекұлы Элиманов	2020 жыл 27 қаңтар — 2021 жыл 28 қаңтар	Қаржы министрлігі Қаржы мониторингі комитетінің төрағасы
3	Жанат Қалдыбекұлы Элиманов	2021 жыл 28 қаңтар — 2024 жыл 13 ақпан	Қаржылық мониторинг агенттігінің төрағасы
4	Дмитрий Михайлович Малахов	2024 жыл 13 ақпан — 2024 жыл 16 қыркүйек	Қаржылық мониторинг агенттігінің төрағасы
5	Жанат Қалдыбекұлы Элиманов	2024 жыл 16 қыркүйектен бастап	Қаржылық мониторинг агенттігінің төрағасы