Қазақстан әдеби қоры

Қазақстан әдеби қоры – жазушылардың қоғамдық бірлестігі (1992 – 1997). Қазақстан әдеби қоры 1992 жылы Қазақстан Республикасының Әділет министрлігінде тіркеуден өткен. Қор мүшелерінің саны – 700-ге жеткен (1996). Шығармашылықпен айналысатын адамдарға қаржылай көмек, әлеуметтік жәрдемдер берумен, әл-Фараби атындағы шығармашылық үйдің жұмысын жүргізумен шұғылданған.

КСРО Әдеби қоры негізінде құрылған жазушылардың халықаралық “Әдеби қор” қоғамдық бірлестігі жұмысын жандандыруға ат салысты. Қаламгерлерді Халықаралық әдеби қор қарамағындағы шығамашылық үйлерге жіберіп, әдебиетшілерге халықаралық әдеби қордың арнайы стипендиясының тағайындалуын қамтамасыз етті. Қаламгерлердің екі қоғамдық бірлестігі арасында қызметтестік туралы келісімшарт (Жазушылар одағына – шығармашылық, қоғамдық-саяси, мәдени жұмыстар, Әдеби қорға – әлеуметтік-тұрмыстық, шаруашылық, кәсіпкерлік жұмыстар) жасауға қол жеткізді. Осы келісімшарт бойынша Қазақстан әдеби қоры әдебиетшілер үйін басқаруға алып (1996), қаламгерлерді елдегі саяси-әлеуметтік, экономикалық реформаларға бейімдейтін іс-шаралар жүргізді. “Әдеби қор жаршысы” – “Вестник Литфонда” газетін шығарды (1996). 1996 жылы 2 желтоқсанда Қазақстан Республикасы Жоғарғы Сотының Қазақстан әдеби қорының құрылуы кезінде заңдылық сақталмаған деген ұйғарымына сәйкес, 1997 жылы 10 қаңтарда Қазақстан әдеби қоры жабылды.