Қазақ ССР Ғылым Академиясының көшпелі сессиясының ашылуы (сөз)

Қазақ КСР Ғылым Академиясының көшпелі сессиясының ашылуы - 1949 жылы Батыс Қазақстанда өткен Қазақстан Ғылым Академиясының көшпелі сессиясының ашылу салтанатында Қаныш Сәтбаевтың сөйлеген сөзі. Ғалымның осы сөзі «Социалдық құрылыс» газетінің сол жылғы 26 қаңтардағы санында жарияланған. Ол Батыс Қазақстанның өндіргіш күштерін зерттеу және пайдалану жөніндегі кейбір негізгі мәселелерді сөз етеді. Батыс Қазақстан Кеңес өкіметі тұсындағы кең зерттеу жұмыстарының нәтижесінде Қазақстанда ғана емес, бүкіл КСРО көлемінде аса маңызды экономикалық аудандардың біріне айналғанын, сонымен қатар, Батыс Қазақстан республикамызда мал шаруашылығы мен балық өнеркәсібі жөнінде жетекші аймақ болып табылатынын, Батыс Қазақстанның өндіргіш күштерінің көбі қазірдің өзінде жеткілікті дәрежеде зерттелгенін, Жайық-Жем бассейнінің жер қойнауындағы қоры Кеңес Одағында және бүкіл дүние жүзінде бірінші орын алмаса да, соған жақын екендігін ескертеді. Сөзінің соңында ғалым Батыс Қазақстанда жанатын газ бен сланец, минерал тұздар және құрылыс материалдары өте нашар игеріліп, тіпті әлі күнге дейін зерттелмегеніне қынжылыс білдіреді. Мұнайлы жерлердегі тұзды күмбездердің химиялық және минералогогиялық құрамы толық зерттелмей отырғаны, Маңғыстау түбегінің минерал байлықтарын зерттеу жұмысы да қанағаттанғысыз екендігіне сын айтып, оларды игерудің мүмкіншіліктерін көрсетеді. Ғалымның көшпелі сессиядағы сөзі 1999 жылы Алматы қаласындағы «Ғылым» баспасынан шыққан 8-томдық еңбектері жинағының 5-тарауына (330-32-беттер) енген.