Қазақ мұнай ғылыми - зерттеу және жобалау институты

Қазақ мұнай ғылыми - зерттеу және жобалау институты - геология және мұнай кен орындарын пайдалану саласындағы ғылыми зерттеулермен, әр түрлі мұнай кәсіпшілік жабдықтарын, мұнай өңдеу кәсіпорындарын және көмекші өндірістерді жобалаумен шұғылданатын мамандандырылған мекеме. 1940 ж. Атырау қаласында "Қазақстан мұнай комбинаты" құрамында "Ембіпроект" жобалау конторы ретінде негізі салынды.

1957-70 ж. "ГипросКазмұнай" мұнай жобалау институты, 1970 жылдан бұрынғы КСРО-ның Мұнай өнеркәсібі министрлігінің Қазақ мұнай ғылыми-зерттеу және жобалау институты. 1978 ж. институт Ақтау қаласында, Атырауда бөлімшесі болды. 1995 ж. бұрынғы институттың Атыраудағы бөлімшесінің негізінде дербес "Каспиймұнайгаз" институты ұйымдасты. 2001 ж. институт "Каспиймұнайгаз" ғылыми-зерттеу институты Акционерлік қоғамы болып қайтадан құрылды, ол ҚР-ның Энергетика және минералды ресурстар министрлігіне бағынышты болды. 2002 ж. акциялардың мемлекеттік пакеті жаңадан құрылған "Қазақ мұнай және газ институты" жабық акционерлік қоғамына берілген. Институт жұмысының негізгі бағыттары: мұнай мен газ кен орындарының геологиясы және оларды игеру саласындағы ғылыми-зерттеу жұмыстарын жүргізу, көмірсутек шикізатын өндіру, тасымалдау, сақтау және өңдеу саласында жобалау - іздеу жұмыстарының кешенін орындау; мұнай-газ өндірісі мен еңбек саласындағы қауіпсіздік техникасының ғылыми-техникалық нормалық құжаттарын жасау. Институттың жобалары бойынша Атырау мен Маңғыстау облыстарында көптеген газ-мұнай кен орындары игеруге берілді, олардың ішінде Өзен, Жетібай, Қаламқас, Мартыши, Прорва т.с.с. ірі кен орындар да бар. Қазіргі уақытта да институт мұнай саласындағы өзінің дәстүрлі тапсырыс берушілеріне және шетелдік капиталмен жұмыс істейтін біріккен кәсіпорындарға ғылыми-жобалау инженерлік қызмет көрсетіп келеді.