Қазоты

Қазоты (лат. Crypsis) – астық тұқымдасына жататын бір жылдық өсімдіктер туысы.

Қазоты
тікенді қазоты
Ғылыми топтастыруы
Дүниесі: Өсімдіктер (unranked) Дара жарнақтылар (unranked) Commelinids Сабы: Poales Тұқымдасы: Poaceae Кіші тұқымдасы: Chloridoideae Тайпасы: Eragrostideae Тегі: Crypsis Ait.
Үлгілік түрі
Crypsis aculeata (L.) Ait.
түрлері
10 түрі белгілі

Еуразия, Солт. және тропиктік Африканың қоңыржай және тропиктік аймақтарында кездесетін 10 – 15 түрі белгілі. Қазақстанда Тобыл – Есіл өзендерінің бойында, Ақтөбе,Мойынқұм, Тарбағатай, Қаратау аймақтарының ылғалды, сор топырақты жерлерінде өсетін 5 түрі бар. Жиі таралған түрлері: тікенді Қазоты (C. aculeata) және қамыстәрізді Қазоты (C. schoenoіdes). Бұлар биікт. 4 – 50 см-ге жететін сабан сабақты өсімдіктер. Жапырақтары таспа тәрізді жіңішке, қынапты. Сабақ ұшына жақын орналасқан жапырақтарының қынабы жалпақ келеді әрі сабақтан сәл ажыраңқырап тұрады. Масақ тәрізді гүлшоғыры сабақтың ең ұшынан дамитындықтан оны сабақ ұшына жақын орналасқан жапырақтың қынабы жауып тұрады. Масағындағы масақшасы қысқа сағақты, екі бүйірінен қысыңқы, масаққа дара орналасады. Гүліндегі масақша қабыршағының ұзындығы 3 – 4 мм, қандауыр тәрізді, қырлы, қылтанақсыз. Гүл қабыршағы мөлдір, жарғақ тәрізді, ұзындығы 5 – 6 мм. Гүліндегі аталық саны 2 – 3. Сәуірден тамызға дейін гүлдеп, жемістенеді. Жемісі – дәнек. Қазотын үй құстары, әсіресе, үйрек пен қаз сүйсініп жейді.