Қамысты мұнай-газ кен орны

Қамысты мұнай-газ кен орны — Атырау облысы Исатай ауданында, Атырау қаласынан батысқа қарай 80 км жерде орналасқан. Құрылымы 1960 жылы сейсмикалық барлау (шағылысу толқындары әдісімен) және құрылымдық бұрғылау арқылы анықталған. Іздестіру және барлау-бұрғылау жұмыстары 1962 жылы басталып, сол жылы кен орны ашылады. Барлау жұмыстары 1975 жылы аяқталған.

Геологиялық құрылымы

Тектоникалық тұрғыдан кен орны – үш қанатты тұз күмбезді. Төменгі бор, ортаңғы юра және пермь-триас шөгінділері мұнайлы. Төменгі бор қабатында 3 мұнайлы, 2 газ-мұнайлы горизонт, ал ортаңғы юра шөгінділерінде 9, пермь-триаста 2 мұнайлы горизонт бар.

Жатыс сипаты

Горизонттардың тереңдігі 199 – 783 м. Шоғыр түрі – қабаттық, күмбезді және тектоникалық қалқаланған қабаттық. Өнімді горизонттар терригендік шөгінділерден түзілген. Коллектордың ашық кеуектлігі 21-27%, өткізгіштігі 0,140-1,699 мкм². Мұнайға қаныққан қабаттың қалыңдығы 3,2-14,4 м, мұнайға қаныққандық коэффициенті 0,75 – 0,84. Бастапқы қабаттық қысымы 2,38 – 8,03 МПа, температурасы 20-40^°С.

Тығыздығы, құрамы

Мұнайдың тығыздығы 0,812-0,919 г/см³ шамасында өзгереді. Оның құрамында 0,05-0,9% күкірт, 1,5-4,92% парафин, 0,06-4,6% асфальтендер, 1,85-17,5% силикагелдік шайырлар бар. Газ құрамы 38,56-78,8% метаннан, 10,28-25,26% этаннан, 3,32-19,52% пропаннан тұрады. Шоғыр режимі – су қысымды. Хлоркальций типті қабат суларының тығыздығы 1,16-1,2 г/см³, минералдылығы 252,8-290,4 г/л. Кен орны игерілуде.