Қаржы-экономика колледжі

Қаржы-экономика колледжі Орал қаласындағы орта кәсіптік білім беретін оқу орны. Қазақ тұтынушылар одағының 1957 жылы 31 қаңтардағы арнаулы қаулысына сәйкес Орал кооператив техникумы ретінде құрылды. Оны ұйымдастырушы әрі алғашқы директоры М.Д.Кортунова. 1998 жылы Батыс Қазақстан облысы тұтынушылар одағының Орал қаржы-экономика колледжі болып қайта құрылды. Оқу орны қаржы, экономика, бухгалтерлік есеп және бақылау, банк, кеден, есептеутехникасы мен автоматтандырылған жүйелерді программамен қамту, менеджмент, қоғамдық тамақтандыру өнімдерінің технологиясы, сақтандыру салаларының мамандарын даярлайды. Колледжде 21 оқу кабинеті, 2 ЭЕМ лабораториясы бар. Соңдай-ақ мұнда негізгі жалпы білім беретін 9 кластық лицей ашылған. Оқыту ақылы келісімшарттық негізде жүргізіледі.