YerkebulanYerbolatov
Сыпайы амандасу қазіргі қазаққа сын ба? Жаһанданудың әсері ме, әлде еліктеушіліктен туды ма, бүгінгі күні жастар арасында амандасудың өзгеше бір түрі қалыптасты. Көшеде бір-бірімен кездесіп қалған жігіттер мен қыздар ешкімнен қысылып-қымтырылмай көрер көзге ұят оғаш қылық көрсетіп бетінен, ернінен сүйіп амандасуды өздеріне ерсі санамайды. Бұл - қазаққа, тек қазаққа ғана емес, жалпы мұсылман жамағатының түсінігіне қайшы. Жалпы, адам баласының рухани тарихында қол жеткізген зор игілігі - сәлемдесу. Оның артықшылығы мен кереметі сонда ─ ол адамзат әдебінің қалыптасуы, бес күндік жалған өмірдегі жұмыр басты пенделердің бір-біріне жылы шырай мен мейір-шапағатын, пейіл кеңдігін үлестіруі.Дініміз Исламның мақсаты да адамдардың бауырмалдығын арттыру болса, ал сәлем соның ең бастапқы сатысы. Сондықтан да қазақта тек жолыққан кезде ғана емес, қоштасар сәтте де бір-біріне сәлем беруін құптайды.Адам баласы қашанда бейбіт, басы аман, бауыры бүтін , бір-бірімен тату-тәтті сыйласып өмір сүруді аңсап, армандаған. Оның негізі сәлемдесуден көрінеді. Бір сахаба пайғамбарымыздан (с.ғ.с.): "Иә, Расулуллаһ екі кісі кездескенде қайсысы алғаш сәлемдесуі керек?" - деп сұрапты. Сонда "Кімнің Аллаһ тағала алдында қадірі мол болса, сол бірінші амандасады", - деген жауап алады. Пайғамбарымыз (с.ғ.с.): "Күмәнсіз Аллаһ алдындағы ең жақсы адам - ең алдымен сәлем бергені", - деген.[1] Кейде достарымыздың арасынан «Ассалаумағалейкум» деп амандасу тек намаз оқитындар айтатын сөз» деген еш негізі жоқ уәжді сөздерді естіп жатамыз. «Ассалаумағалейкум» деп амандасу - ол тек намаз оқитын адам ғана емес, жалпы мұсылман қауымына парыз.Дәл осылай сәлем беру арқылы мұсылман жамағаты бір-біріне саулық пен бірлікті мақсат тұтқан. Кез келген мән- мағанасыз («привет», «қалайсың» деген) сөзден, Аллаһтың есімін ауызға алып амандасу мың, тіпті милиион есе артығырақ. Міне, бұл - сәлем берудің ең әдемі үлгісі. Біз де амандасу әдебіне сай амал етіп, кездескенде алғашқы болып сәлем беруге асығайық