Қисыққұдық-1 Аққорған

Қисыққұдық-1 Аққорған— ортағасырлық қорған орны. Көксарай аулынан оңтүстік-батысқа карай 6 км жерде. 2003 ж. Отырар мемлекеті археологиялық қорық- музейінің археологиялық экспедициясы (жетекшісі С.Ахмет) зерттеген. Қазіргі орны төртбұрышты төбе. Оның батысынан басқа жақтары тегіс келген. Қорғанның өлшемдері: 40x40x40x41 м, солтүстік және шығыс бұрыштарының биіктігі 0,5— 0,7 м, Оңтүстікмен батыс бұрыштарының биіктігі 1,2—2 м аралығында. 8 мұнара және бекініс қабырғасының орны байқалады. Қабырғаның қазіргі күнгі жалпақтығы 5,5 м,биіктігі 0,7—0,7 м. Қорғанға кірер қақпа солтүстік-батыс қабырғада болған сияқты. Ауданы 30x23 м тағы бір кішілеу қорғанның да есігі сонда қараған. Қорған периметрі бойынша ормен қоршалған. Ескерткіш маңынан көне канал орындары анықталған. Жинастырылған бұйымдарға қарағанда (қыш ыдыс сынықтары) ескерткішті халық 9—12 ғасырларда мекен еткен.