Қозыбай ескерткіші

Қозыбай– ескілікті сәулет ескерткіші. Солтүстік Үстірттегі Қызылтастың оңтүстік-шығыс жағынан 43 км жерде. Өз заманында қазақтарды алғаш Үстірт пен Маңғыстауға бастап қоныстандырушы, жергілікті түрікмен бектері, Хорезм (Хиуа) хандығы және орыс саяхатшыларымен жақсы қарым-қатынаста болған, белгілі бай Қозыбайдың мекені болуы себепті соның атымен аталып кеткен. Осы төрткіл үйік, сақ заманының ескерткіші саналатын Қозыбайдан топограф П.В. Алексеев 1851 жылы тастан қашалған бірнеше адам мүсінін тапқан, оларды сипаттап жазып, суретін салып алған. Соның бірі жебе толы қорамсақ асынған, кісе байлаған сарбаз; екіншісі мойнына төрт қатар моншақ тағып, сырға салған әйел бейнесі; бірақ екеуі де сынып қалған. Қозыбай үйігінде мұндай мүсіндердің бірнешеуі кездеседі.