Қола-графитті материал

Қола-графитті материал – қоладан, қола кристалдарының арасында бірқалыпты таралған графит түйіршіктерінен тұратын күйдірілген кеуекті материал.

Химиялық құрамы: негізі мыс, қалайы – 8,5-9%, графит – 1,5-3%. Кеуек қуыстары минералды немесе синтетикалық маймен толтырылады, мұндай материал үйкеліске төзімді келеді. Қола-графитті материал ұнтақтық металлургия әдісімен алынады. Кең көлемде 20-ғасырдың 30-40-жылдарында пайдаланыла бастады.

Қола-графитті материалдардан сырғанау мойынтіректеріне (подшипниктеріне) арналған төлкелер жасалады. Қола-графитті материалдардың ерекшелігі болатпен жанасқандағы үйкеліс коэффициентінің төмендігі. Қола-графитті материалдың жұмыстық температурасы 75-80 градус. 20 м/с сырғанау жылдамдығындағы рұқсат етілген кернеу 6–8 Мн/м2, қаттылығы 18–20 НВ. Қола-графитті материалдан бұйымдар дайындау өндірісінде шикізат ретінде: қола, мыс, қалайы, мырыш, қорғасын ұнтақтары пайдаланылады.