Қоныш

Қоныш. Етік, пима сияқты аяқ киімдердің балтырды жауып тұратын бөлігі. «...аяғындағы байпағының қонышын барқытпен көмкерген жаңа қара етік» (М. Әуезов, Қараш.). «Қоныш» сөзі қазіргі кездегідей аяқ киім бөлігін білдіретін мағынаға иеленбегендігі кейбір туыс тілдер дерегінен белгілі. Тунгус-маньчжур тілдерінің бірінде «кенчэн» тұлғасы біздің тіліміздегі «жіліншік, сирақ» мағыналарында қолданылады. «Көнчэн» сөзі кейбір түркі тілдерінде, оның ішінде қазақ тілінде аяққа киетін киім белігін білдірерлік мағынаға кешіп, тұлғасы «қоныш» болып қалыптасқан. моңғол тобына жататын тілдердің бірі — қалмақтарда тунгус-маньчжур тілдерінің осы сөзі «һосн» тұлғасына дейін өзгеріске түсіп, «етік» мағынасында айтылатынын да еске сала кетеміз. Мұндай жағдайлар тілдерде жиі кездесіп отыратын құбылыс.