Қуандық Сабырбайқызы

Қуандық Сабырбайқызы (1843; Шығыс Қазақстан облысы Абай ауданы - 1928; сол жерде) – ақын, әнші, домбырашы. Шыққан тегі Найман ішінде Сыбанның 17 ақыны шыққан ақындар әулетінде дүниеге келген. Айтыс өнерінің шебері Сабырбай Ақтайлақұлы қызын жас күнінен сөз өнеріне баулып өсірген. Қуандық шаршы топта жыр додасына түсіп, әншілік, ақындық өнерімен ел құрметіне бөленген. Қара өлеңге ете жүйрік болған.

Қуандық Сабырбайқызы
Туған кездегі есімі	Қуандық Сабырбайқызы
Туған күні	1843 (1843)
Туған жері	Шығыс Қазақстан облысы Абай ауданы
Қайтыс болған күні	1928 (1928)
Қайтыс болған жері	Шығыс Қазақстан облысы Абай ауданы
Мамандықтары	айтыскер ақын, сазгер, композитор
Аспабы	домбыра

Абайдың Қуандықпен көздесуі оның жан дүниесінде үлкен серпіліс туғызған. Талантты ақын қыз Абай назарына ілігіп, тіл табысқан. Қуандық ақындық дәстүр бойынша өткір тілмен міней сөйлеп, Абаймен айтысуға дейін барған. Көлемі 2–3 шумақтан аспайтын бұл сөз қағысулары зілсіз әзілмен бір-біріне сәлем жолдау ғана. Екі жастың жарасқан көңілін байқаған Сабырбай ақын оларға өлеңмен басу айтқан. Ел аузындағы естеліктерге қарағанда, Абай Қуандыққа үйленбекші де болған. Бірақ Абайдың ата-анасы Ділдәға құда тұсіп, сөз байласып қойғандықтан, оның бұл тілегі орындалмаған. Қуандық ақын замандасының өлеңдері мен әндерін халық арасына таратуға көп еңбек сіңірген. Қуандықтың Абай шығармаларын сақтап, насихаттаудағы еңбегіне М. О. Әуезов жоғары баға берген. Абайдың Сабырбаймен және оның қызы Қуандықпен көздесуі туралы М. Әуезов орыстың белгілі жазушысы П. Кузнецовқа жазған хатында айтқан. Қуандықтың Абай және әкесі Сабырбаймен, т. б. ақындармен айтыстары Қазақстан Республикасының Ұлттық ғылым академиясының орталық ғылыми кітапханасы қорында сақтаулы.