Құс сүзегі

Құс сүзегі - құстың жұқпалы ауруы. Қоздырушысы Salmonella gallіnarum микробы. Бұл аурумен ересек құстар және 1 күндігінен бастап 3 — 4 айға дейінгі балапандар ауырады. Құс сүзегі ауру құс саңғырығымен бірге сыртқа бөлінген микробтар жайылым, азық, су арқылы және асқазан, тыныс жолы, терісі, т.б. мүшелердің жарақаттануы арқылы да жұғады. Бүрге, кенелер де таратуы мүмкін. Ауырған құс бір орында ұзақ теңселіп тұрып қалады. Қанаттары үрпиіп жылы жер іздейді, жемге зауқы болмайды, шөлдей береді. Көзі жасаурап, былшықтанады, кейде мұрнынан сары су ағады.

Жіті түрі 3 — 5 күнге созылады, дене қызуы 43С-қа дейін көтеріледі. Аурудың алдын алу үшін құс қорасындағы барлық құстарды тексеріп, ауру деген күмәнді құстар оқшауланады. Құс қорасына зарарсыздандыру шаралары жүргізіледі. Емі: ауру құстың күтімін жақсартып, құнарлы азық береді. Су орнына 2 — 3 күн бойы марганец қышқыл калийдің (1:20000) судағы ерітіндісін және натрий норсульфазолының 0,02 — 0,04%-дық ерітіндісін ішкізеді. Ауру белгісінің сипаты білінген тауыққа 6 — 10 тәулік бойы 40 мг, күркетауыққа 80 мг фуразолидон беріп, Құс сүзегі шыққан шаруашылыққа карантин салынады.