Құтан әулие кесенесі

Құтан әулие кесенесі - сәулет өнерінің ескерткіші. Нысанның орналасқан жері: Қостанай облысы, Аманкелді ауданы, Амантоғай ауылының маңында Арқалық-Амангелді тас жолының бойында, Қарынсалды өзенінің шығыс жақ қыратында орналасқан. Амантоғай ауылынан Арқалыққа қарай 10 км жерде. Кесене бірнеше рет жаңартылған. Әулиенің ұрпақтары зиратты 1977 және 2008 жылдары жаңалап жөндеген. Құтан әулие ұрпақтары Қарағанды облысының Ұлытау ауданы, Жезқазған, Сәтбаев қалаларында тұрады. Бүгінгі күнге дейін әулиеге келушілер үзілген емес. Келушілерге арнап кесенеге жақын жердегі бұлақ басынан шағын қонақ үй тұрғызылған. Құтан Аталықұлы 1690-1780 ж.ж. аралығында өмір сүрген әруақты әулие адам болған. Ұлытау өңірінде дүниеге келген Құтан бабамызға әулиелік, көріпкелдік, емшілік бала кезінен қонған. Барлық саналы ғұмырын халықтың денсаулығын қорғауға арнап, ел мен жердің тағдырына араласқан. Зерттелуі: Торғай елі. Энциклопедия. Құрастырған Т. Рсаев. Алматы, «Арыс» баспасы, 2013 жыл. Өміртай Жәлелов, өлкетанушы, профессор. «Жүрегінің түгі бар Құттымбет батыр» Қостанай облысы Торғай аймағы көрікті жерлерінің ақпаратты бағдар тізбесі ( Е. Цвентух, Ш. Бәйділдин, А. Аймағамбетов, И. Роговой Д. Артюх және т.б авторлары). Қостанай: «Шапақ», 2011 жыл.

Дереккөз