Үлкен сарыбауыр шымшық

Үлкен сарыбауыр шымшық- үлкендігі торғайдай, әдемі шапшаң қимылды құс. Оны арқасындағы көкшіл, көкірегіндегі қара жолақты сары реңінен және басындағы қара бөрікшесінен оңай ажыратуға болады. Бұл- ақпанның соңғы, наурыздың бас кезінде көктем мен жылы күндердің жақындап келе жатқанын білдіретін жаршы тәрізді, қысқа үнмен сыңғырлай сайрайтын құстардың бірі.

Үлкен сарыбауыр шымшықтар аса өсімтал. Ол өте ерте ұялап, оған 12-ге дейін жұмыртқа салады. Екі аптадан соң балапан шығып, үш аптадан кейін балапандары ұядан ұшады. Көп ұзамай ересек құстар кейде сол ұяның өзіне екінші рет жұмыртқалауға кіріседі.

Үлкен сарыбауыр шымшық аралас ормандарда, парктерде, бақтарда, адам қоныстанған жерлерде кездеседі. Күзде және қыста олар шағын топ құрады. Сарыбауыр шымшықтар бұтақтан бұтаққа қонып, ағаш қабығының арасындағы саңылауларға қыстырылып қалған жәндіктерді зер сала іздейді.