Ұсатқыш машина

Ұсатқыш машина — қатты материалдарды (әсіресе минералдық заттарды) ұсақтауға арналған машина. Ұсатқыш машинаның негізгі жұмыстық тетігі — ұсатқыш. Ұсатқышының пішініне қарай ұсатқыш машина 5 түрге ажыратылады.

1. Жақ тәрізді ұсатқышы бар ұсатқыш машинада материал екі тік бұрышты плитаның арасындағы сына тәрізді кеңістікте қысыла отырып ұсатылады.
   
2. Конус тәрізді ұсатқышы бар ұсатқыш машинада материал екі конус арасындағы кеңістікте ұсатылады.
   
3. Білік тәрізді ұсатқышы бар машинада бір-біріне қарама-қарсы бағытта бірдей жылдамдықпен айналатын екі параллель цилиндр біліктің арасында ұсатылады. Морт және жұмсақ материалдар (мысалы, көмір, тұз) үшін тісті білік тәрізді ұсатқышы бар ұсатқыш машина қолданылады.
   
4. Балғалы ұсатқышы бар ұсатқыш машинада материал шапшаң айналатын роторға топса арқылы бекітілген балғамен соққылау нәтижесінде ұсатылады.
   
5. Ұсатқыш машинаның өзек тәрізді ұсатқышы бар түрі (қараңыз Дезинтегратор) 1859 ж. Англияда жасалды.
   

Ұсатқыш машинаның алдыңғы үш түрі қатты материалдарды (кентас, құрылыс тастары, т.б.), ал балғалы ұсатқыш машина морт және жұмсақ материалдарды (көмір, әктас, боксит, т.б.) ұсақтау үшін пайдаланылады.

Сілтемелер

"Қазақ Энциклопедиясы", 9 том