Әзірбаев мұражайы

Әзірбаев мұражайы - Қазақстанның халық акыны Кенен Әзірбаевтың әдеби-мемориалдық мұражайы. Жамбыл облысы Қордай ауданы Кенен ауылында орналасқан. 1981 ж. 13 наурызда ашылған.

Мұражай негізінен, үш көрме залдан тұрады. Мұражай қорына арналған қосымша бөлме бар. Ақынның бейіті де осы жерде, оның басына көктастан ескерткіш орнатылған. Мұражай залдарында әнші әрі композитор ақынның өмір жолын, шығармашылығын бейнелейтін 961 экспонат жинақталған. Олардың ішінде ақынның 13 жасында жасатқан домбырасы, қырғыз манабы Шабдан Жантайұлының асында жыр алыбы Жамбыл сыйлаған күміс белбеу, екі мәрте Социалистік Еңбек Ері атағын алған Ж. Қуанышбаевтың Хантаудан әкеп сыйға тартқан мәрмәр тасы құнды экспонаттар болып есептеледі. "1916 жыл", "Ұлы отан соғысы жылдарындағы ақын шығармашылығы", "К.Әзірбаевтың 100 жылдық тойы", "Кенен және өнер қайраткерлері" деп аталатын арнайы ұйымдастырылған бұрыштар ақынның өмірінен мол мәліметтер береді. 1981 ж. мұражайдың ашылуына байланысты ақын өмірі мен шығармашылығы туралы "Жамбыл мұрагері", "Кенен қанаттары" атты фильмдер түсірілген.