Ән-би ансамблі

Ән-би ансамблі -музыкалық және хореографиялық өнердің бірнеше түрінен құралған ұжым. Ол, негізінен, вокалдык орындаушылық (хор, ансамбль), аспаптық музыка (оркестр немесе халық аспаптар ансамблі, фортепьяно, т.б.), жеке және көпшілік билері, көркем сөз оқу (тақпақ пен диалогтар) сияқты орындаушылар тобын қамтиды. Ансамбль бағдарламасы ән-би, музыка аспаптық шығармасы мен әдеби жанрдан құралады. Ән-би ансамблінің өз алдына жеке көркем ұжым түрінде туып қалыптасуы мен өсіп дамуына 1928 ж. ұйымдастырылған Қызыл Тулы Кеңес Армиясы Ән-би ансамблі тікелей әсер етті. Осы ұжымның ізімен соғыс теңіз флоты, әскери округтер, т.б. және су келігі, кәсіподақ, мектеп, сондай-ақ, одақтас, автономық республикаларда КСРО халықтарының ән-би шығармашылығын насихаттайтын көптеген ансамбльдер (мыс., КСРО халықтарының Ән-би ансамблі, Грузин халықтарының Ән-би ансамблі., "Гүлдер" ансамблі, Қазақ Ән-би ансамблі Өзбекстанның "Бахор", Ән-би ансамблі Татарстанның Ән-би ансамблі және т.б.) құрылды. Көпшілік әні, осы заман композиторларының хор композициялары, халықтың ән-билері мен өлең тақпақтары Ән-би ансамблінің негізгі қоры болды. Осындай түрлі жанрлық туындыларының өзара тоғысуы арқылы Ән-би ансамблінің жүйелі композициясы қүралады. Кезінде Қазақстанда жоғары педагогика оқу орындары жанынан (Алматы, Атырау, Семей, т.б.) жөне көркем өнерпаздар үйірмелері негізінде құрылған "Сыр сұлуы" (Қызылорда), "Айгөлек" (Шығыс Қазақстан облысы), т.б. ансамбльдер жұмыс істеді.