Әуе Шабуылына Қарсы Қорғаныс Әскері
Әуе Шабуылына Қарсы Қорғаныс Әскері, Әуе қорғанысы күштері — мемлекеттің Қарулы Күштері құрамындағы елдің әуе кеңістігін, саяси-әкімшілік орталықтарын, стратегиялық маңызы бар объектілер мен шаруашылық аудандарын әуе шабуылынан қорғау үшін құрылған әскер түрі.[1]
Әуе шабуылына қарсы қорғаныс әскері 1-дүниежүз.
соғыс жылдарында (1914 — 1918) авиацияның ұрыс қимылдарына араласуына байланысты пайда болды. Ұлы Отан соғысы (1941 — 1945) жылдарында өз алдына жеке әскер ретінде саяси-әкімш. орталықтарын, өнеркәсіп аудандарын және майдандағы армиялардың тылын әуе шабуылынан қорғауда негізгі рөл атқарды. КСРО-ның әуе кеңістігін қорғауда көрсеткен ерліктері үшін 92 жауынгер Кеңес Одағының Батыры атағына ие болып, 80 мыңнан аса адам ордендермен және медальдермен марапатталды. Соғыстан кейінгі жылдары Кеңес өкіметі әскердің бұл түріне үлкен мән беріп, ең соңғы ғылым мен техника жаңалықтарымен жабдықтауға күш салды. Қазақстан тәуелсіздік алғаннан кейін жасалынған жаңа әскери доктринаға сәйкес 1997 жылы 17 қарашада Қазақстан Республикасы Президентінің Жарлығымен Әуе шабуылына қарсы қорғаныс әскері қайта құрылып, әскердің бұл түрі Әуе қорғанысы күштері құрамына енгізілді.
Қазіргі заманғы шабуылдаушы әскери-әуе құралдарының барлығы да жойқын қиратқыш күштерге ие, дыбыстан да тез жылдамдықпен алыс қашықтыққа ұша береді. Сондықтан Әуе шабуылына қарсы қорғаныс әскері жаудың ұшқыш аппараттарын табу, тану және жою, сондай-ақ, әуе шабуылы туралы әскерді, флот күштерін, азаматтық қорғаныс органдарын, тұрғындарды, тылдағы объектілерді алдын ала хабарландыру шараларын ұйымдастырады. Олар: әуе қорғанысы авиациясынан, зениттік-ракеталық, радио-тех. арнайы бөлімдерден тұрады. Еліміздің әуе қорғанысы авиациясы МиГ-29, МиГ-31, Су-25, Су-27 сияқты ең жаңа ұшақтармен жарақталған, зениттік-ракеталық бөлімдер түрлі биіктікті қамтитын С-75, С-70, С-300 ракеталық қондырғылармен қаруланған, ал радиолы-техникалық басқару орталықтары түгелдей автоматтандырылған. Кадрлар дайындау Қазақстан мен Ресей Федерация арасындағы шартқа сәйкес Ресейдің Әскери авиац. тех. университетінде, Әскери Әуе академиясында, Әуе шабуылына қарсы қорғаныс әскері университетінде, сондай-ақ, Қазақстандағы Ақтөбе жоғары әскери авиация училищесі мен басқа да оқу орындарында жүзеге асырылады. Бұған қоса Қазақстан ТМД елдері бойынша әуе шабуылына қарсы қорғаныстың бірлескен жүйесін құру жөніндегі келісімге қатысушы елдердің бірі болып табылады.[2]
Дереккөздер
өңдеу- ↑ Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет.ISBN 9965-893-73-Х
- ↑ «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, I том
| Бұл мақаланы Уикипедия сапа талаптарына лайықты болуы үшін уикилендіру қажет. |
|
Бұл — мақаланың бастамасы. Бұл мақаланы толықтырып, дамыту арқылы, Уикипедияға көмектесе аласыз. Бұл ескертуді дәлдеп ауыстыру қажет. |