Өсімдік рагы

Өсімдік рагы - зиянды саңырауқұлақ, бактериялар, кейде аяз салдарынан өсімдіктің кейбір бөлігінің дұрыс өспей, шектен тыс ұлғайып ісікке, бұдырға айналуы. Өсімдік рагының ең көп таралған және зиянды түрі тамырдың бактериялы рагы, алманың қара рагы, картоп рагы. Тамырдың бактериялы рагы негізінде жеміс өсімдіктері тамырын немесе тамыр мойнын, қызылша тамыр жемісін, құлмақ, раушангүл, крестігүді дақылдар тамырын зақымдайды, жеміс ағашы питомниктеріне көп зиян келтіреді. Алманың қара рагы негізінде шекілдеуікті, жемісті алма, алмұрт, мушмула, айва, сирек те болса сүйекті жемісті ағаштарды, сондай-ақ құрма, грек жаңғағын және қартайған немесе күтімі нашар бақ ағаштарын зақымдайды. Картоп рагы қоздырғышы картоппен қатар томат, меңдуана, сасық меңдуана тағы да басқа алқа тұқымдасы өсімдіктеріне түседі. Томаттың бактериялы рагы томат жемісін, сабағын зақымдайды да бұтағы жапырағы солып қалады. Өсімдік рагы қоздырғышы өсімдікке тамырының, сабағының жарақаттанған жерінен енеді. Кесел қоздырғыштарының дамуына жапырақ ылғалдылығы мен жылылығының да әсері бар. Мысалы, тамырдың бактериялы рагының ісігі 22-30°C жылылық, 80% ылғалдылықта тез өседі. Өсімдік рагына шалдыққан өсімдіктер жинап алынып өртеледі. Ауру аз таралған жағдайда ауру бұтақтары немесе бөліктері кесіп алынып, оны арнаулы химиялық препараттармен дезинфекциялайды. Мұндай жерге ауру түріне қарай 2-5 жылға дейін осындай ауруға сезімтал өсімдіктер түрі егілмейді. Тұқымды дезинфекциялау, тыңайтқыш қолдану тағы да басқа агротехникалық шаралар қолданылады.