TAN (телеарна)

TAN
	TAN
	«ТАН» Телерадиокомпаниясы» ЖШС
Ел	Қазақстан
Хабар тарату аумағы	Қазақстан
Хабар тарату уақыты	тәулік бойы
Хабар тарату тілдері	қазақша, орысша
Басқару орталығы	Алматы, 3-шағын аудан, 40Б
Арнаның тақырыптамалары	ойын-сауық, танымдық
Хабар таратуын бастады	1 наурыз 1991
Хабар таратуын аяқтады	1 қазан 2021
Негізін салушы	Лейла Храпунова
Бұрынғы атаулары	ТАҢ (1991-2015) ; ОҢ (2015-2017) ; ON! Пятница (2017-2018) ; ON (2018-2020)
Сайт	tantv.kz

TAN — 1991 жылы ашылған қазақстандық алғашқы жекеменшік телеарналардың бірі. Алматы қаласынан хабар таратып келді. 2021 жылы 1 қазанда хабар таратуын тоқтатты.

Тарихы

Қазақстанның ең ескі жекеменшік телекомпаниясы «ТАҢ» 1990 жылы желтоқсанда Алматыда құрылды. Эфирге алғаш рет 1991 жылы 1 наурызда шықты. Телекомпанияның құрылған сәтінен бастап басында Ләйлә Қалибекқызы Бекетова - Храпунова тұрды. Алғашқы жылдары телекомпания Амангелді және Қабанбай батыр көшелерінің бұрышындағы ғимараттың шағын жертөлесінде орналасты.

1998 жылы «ТАҢ» телекомпаниясы сатылып, саясаткер әрі бизнесмен Мұхтар Әблязовтың қолына өтеді.^[1]

1999 жылы «ТАҢ» телекомпаниясының басшылығы ауысты. Шығармашылық ұжым Достық 87 мекенжайында орналасқан көп қабатты үйге көшіп, телекомпанияны Бақытжан Кетебаев басқарды. Компанияның хабар тарату кестесінде жаңалықтар негізгі рөл атқарды. Телекомпания журналистері тікелей эфирге көптеген даулы сюжеттерді шығарды. Соған байланысты «ТАҢ» телеарнасының алматылықтар арасында танымалдығы өсті.

«ТАҢ» телекомпаниясы саясилана бастап, өз материалдарында оппозициялық күштерге артықшылық берді. Бұл «ДВК» атты саяси күш пайда болған кез болды. 2002 жылы 29 наурызда Алматы телемұнарасында орналасқан «ТАҢ» телестанциясының антенналық-фидерлік құрылғысын спайнерлік винтовкамен атып кетті. Хабар тарату тоқтап, ұжым мәжбүрлі демалысқа шығарылды. Соңында телекомпания жабылудың аз-ақ алдында қалды.

2002 жылы 16 қыркүйекте «ТАҢ» телекомпаниясы сол кездегі «31 арна» медиахолдингінің иесі Арманжан Байтасовқа сатылды. Жаңа басшылықтың келуімен телекомпанияның жаңа өмірі басталды. «ТАҢ» ТРК-ның Алматы қалалық телевидениесі ретіндегі жаңа концепциясы бекітіліп, жарты жылға үзілген телехабар тарату жалғасты және бұрынғы ұжым сақталып, өзіндік бағдарламаларын өндіру алға қойылды.

2008 жылы «ТАҢ» ТРК Ұлықбек, 40Б мекенжайында орналасқан бес қабатты бөлек ғимаратқа көшті. Хабар тарату аумағы Алматы қаласы мен Алматы облысына кеңейді.^[2]

2014 жылы қыркүйектен бастап бүкіл республикаға хабар тарата бастады.

2015 жылы 15 қарашада «ТАҢ» телеарнасының атауы «ОҢ ТВ» болып өзгертілді. Сонымен бірге арнаның форматы спорттық, ойын-сауық, танымдық және іскерлік телеарна болып өзгерді.^[3]

2020 жылы 22 қыркүйекте телеарна бұрынғы «TAN» (ТАҢ) атауын кері қайтарды.^[4]

2021 жылы 1 қазанда телеарна жұмысын тоқтатты.^[5]