Александр Михайлович Иванников

Александр Михайлович Иванников (26.12.1913, Украина, Ворошиловград облысы, Славяно-сербск ауданы, Зимогорье қаласы - 16.3.1974, Алматы қаласы) - 2-дүниежүзілік соғысқа қатысушы, полковник. Кеңес әскері қатарында 1935 жылы болып, Харьков жаяу әскер училищесін (1938), кейін командалық құраманың курсын бітірген. 1941 жылдың қарашасынан З-Беларусь майданы 11-гвардиялық армия 1-гвардиялық атқыштар дивизиясы 169-гвардиялық атқыштар полкі кұрамында Ұлы Отан соғысына қатысқан. 1945 жылы Шығыс Пруссия операциясы барысында Калининград облысын жаудан азат етуде полк бөлімшелерін шебер ұйымдастырғаны үшін КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (5.5.1945). Соғыстан кейін әскери қызметін жалғастырып, «Выстрел» курсын тәмамдаған (1947). 1955 жылы запасқа шықты. Калининград қаласындағы Оңтүстік вокзалдың ғимаратына мемориалдық тақта орнатылып, бір көшеге есімі берілген. Ленин, 3 Қызыл Ту, Александр Невский, «Қызыл Жұлдыз» ордендерімен, медальдармен марапатталған.