Александр Сергеевич Попов

Попов Александр Сергеевич (22.12.1891, Ресей, Рязань облысы, Шацк қаласы — 13.3. 1974, Алматы) — кен маманы, техникалық ғылымдар докторы (1937), профессор (1927), Қазақстан Ғылым Академиясының академигі (1954). Өзбекстанның (1945) және Қазақcтанның (1954) еңбегі сіңірген ғылыми қайраткері. Санкт-Петербург тау-кен институтын бітірген (1919). 1924 — 41 ж. Мәскеу тау-кен академиясында оқытушы, доцент, профессор бола жүріп, Мәскеу алтын және түсті металдар институтының, Бүкілодақтық кәсіпкерлер академиясының, Мәскеу түсті металдар институтының, ал 1938 — 49 ж. Орта Азия индустрия институтының профессор, 1947 жылдан өмірінің соңына дейін Қазақ Тау-кен институтында ғылыми және басшылық қызметтер атқарған. Негізгі ғылыми еңбектері кен ісі саласының техникалық-экономикалық талдауына арналған. Попов алдын ала белгіленген үңгубет ұзындығын, механизмдерді толық пайдаланудың жаңа әдісін ұсынды, Ангрен кен орнын өндірістік игерудің болжамын және шахтаның жылдық өнімділігін белгілейтін әдістің негізгі жобаларын жасады. Еңбек Қызыл Ту, Ленин ордендерімен және медальдармен марапатталған. Шығармалары: Развитие горной промышленности и горной науки в Казахстане за годы Советской власти. В кн.: Наука Советского Казахстана (1920 — 1960), А.-А., 1960.

Дереккөздер

• Қазақ энциклопедиясы