Алтын хан - құрметті лауазым. Ертеректе моңғолдар чжурчжэндердің, Цзинь мемлекетінің императорларын, ал 17 ғасырдан моңғолдардың хотогойт руының билеушілерін осылай атаған. Алтын хан мемлекеті негізінен хотогойт руынан құралып, Халханың солт.-батыс аймағына орналасты. 16 ғасырдың соңғы кезеңінде Шолой-Убаши қонтайшы осы Алтын хан мемлекетінің негізін калаған. Территориясы: солтүстігінде Саян тауларына дейін, оңтүстігінде Моңғол Алтайының етегіне дейін, батысында Ертіс өзенінің жоғарғы жағына дейін, шығысында Косогол және Сангин-Далай көлдеріне дейінгі жерлерді алып жатты. Алтын хан лауазымы кейін ханның лақап атына айналған. Алтын хан - тарихтағы белгілі тұлға. Ол Туметте 1507-82 ж. өмір сүрген. Хан атағын алып, Моңғолдарды біріктіру жолында күрес жүргізген. Алтын хан тұсында ламашылдық моңголдар арасына ресми дін ретінде енді. Алтын хан Қытаймен бейбіт қатынас орнатуды көздеді. Ордасы Оңтүстік Моңғолиядағы Хухэ деген жерде орналасқан (қазіргі Хух-Хото).[1]

Дереккөздер өңдеу

  1. Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет.ISBN 9965-893-73-Х