Анатолий Қожекенұлы Құлназаров

Анатолий Қожекенұлы Құлназаров - 1946 жылы 18 ақпанда Шығыс Қазақстан облысы Риддер қаласында туған. Қазақ. Әкесі - Құлназаров Қожекен. Анасы - Құлназарова Рахила. Өскемен педагогикалық институтының дене шынықтыру факультетін бітірген (1968), дене тәрбиесінің мұғалімі. Педагогика ғылымдарының докторы (1999). Докторлық диссертациясының тақырыбы: «Қазақстан Республикасындағы дене шынықтыру қызметтерін жүзеге асырудың ұйымдастырушылық-педагогикалық негіздері». Профессор. Балтық халықаралық педагогика ғылымдары академиясының (2001), Спорт ғылымдары еуропалық ассоциациясының академигі (2006 жылдан). Петров ғылым және өнер академиясының толық мүшесі (Санкт-Петербург қаласы, 2003). 260-тан астам ғылыми әдістемелік жұмыстың, оқулықтардың, монографиялардың, оның ішінде «ҚР дене шынықтыру қозғалысы» монографиясының; «Спорт, дене шынықтыру, денсаулық, еңбек», 1996-2000 жылдардағы спортты жаппай дамытудағы мемлекеттік бағдарламалар тұжырымдамаларының авторы; ҚР Парламенті бекіткен «Спорт туралы» заңының, ҚР түрғындарының физикалық дайындығы президенттік тестін әзірлеушілерінің және бастамашыларының бірі. Қазақ және орыс тілдерін біледі. «Нұр Отан» ХДП мүшесі.

• 1968 жылдан - Жамбыл атындағы орта мектептің дене шынықтыру пәнінің мұғалімі.
• 1970-1977 жылдары - ШҚО ЖБСМ жеңіл атлетикадан жаттықтырушысы, директордың оқу ісіжөніндегі орынбасары.
• 1971-1972 жылдары - Өскемен педагогикалық институтының спорттық тәртіп кафедрасының оқытушысы.
• 1972-1976 жылдары - ШҚО облХББ мектеп инспекторы.
• 1976-1979 жылдары - Республикалық спорттық кәсіптік орта мектеп-интернаты директорының спорттық оқу ісі жөніндегі орынбасары.
• 1978 жылдан - ҚазКСР халық ағарту министрлігі дене тәрбиесі басқармасының бастығы.
• 1982 жылдан - Республикалық жалпы орта білім беретін спорттық кәсіптік мектеп-интернатының директоры.
• 1985 жылдан - ҚазКСР халық ағарту министрлігі дене тәрбиесі басқармасының бастығы.
• 1987 жылдан - ҚазКСР Мемспортком оқушы жастар мен спорттық резервтер бөлімінің бастығы.
• 1989 жылдан - ҚазКСР Мемлекеттік жастар ісі, дене шынықтыру және спорт жөніндегі комитетінің Спорт түрлері мен олимпиадалық резервтер басқармасы бөлімі бастығының орынбасары.
• 1991 жылдан - ҚазКСР Білім беру министрлігі дене шынықтыру жөніндегі бастығы.
• 1993 жылдан - Жастар ісі, туризм және спорт жөніндегі министрдің бірінші орынбасары.
• 1997 жылдың сәуір айынан - ҚР Білім және мәдениет министрлігі туризм және спорт департаменті директорының орынбасары.
• 1997 жылдың қараша айынан - ҚР Білім, мәдениет және денсаулық сақтау министрлігі Туризм және спорт комитеті төрағасының орынбасары.
• 1998 жылдан - ҚР Денсаулық сақтау, білім және спорт министрлігі Спорт және дене шынықтыру комитетінің төрағасы.
• 1999 жылдан - ҚР Премьер-министрінің кеңесшісі.
• 2000 жылдан - ҚР Білім және ғылым министрлігінің «Ұлттық ғылыми тәжірибелік дене тәрбиесі орталығы» РМҚК бас директоры.
• 2006 жылдан - ҚР Туризм және спорт министрлігі Спорт комитетінің төрағасы.
• 2010 жылдан бері - «2011 жылғы VII қысқы Азия ойындарының ұйымдастыру комитетінің атқарушы дирекциясы» АҚ президенті.

ҚР ұлттық олимпиада комитетінің бірінші вице-президенті (2002 жылдан). Қазақстан Футбол федерациясы атқарушы комитетінің мүшесі (2007 жылдан). Жеңіл атлетикадан және орташа қашықтыққа жүгіруден КСРО спорт шеберлігінің кандидаты. ҚазКСР Еңбек сіңірген жаттықтырушысы. ҚазКСР Еңбек сіңірген мұғалімі. Қазақстанның Еңбек сіңіргөн қайраткері. Халықтар достығы орденімен (1988), ҚР Құрмет грамотасы- мен марапатталған.

Үйленген. Жүбайы - Құлназарова Кадрия Гатьятовна. Ұлдары - Алмир (1967 ж. т.), Таир (1970-2006). Немересі бар.