Балақұлболды

Балақұлболды — қола дәуірінің орта және соңғы кезеңінен сақталған зираттар. Қарағанды облысы Қарқаралы тауының батысында орналасқан. 1969 жылы Ә. Х. Марғұлан басқарған Орталық Қазақстан археология экспедициясы 20-ға тарта объектіні қазған. Балақұлболды қорымында 200-ге жуық дөңгелек, төртбұрышты, шаршы қоршаулар бар. Қазылған қоршаулардың ортасында үлкен плиталардан құрастырылып, батыстан шығысқа қарай бір-бірімен жапсарлас жұптастырыла қойылған тас табыттар сақталған. Ондағы мүрделер тізелерін бүгіп, оң бүйіріне жатқызылған. Отырғызып жерлеу әдісі де қолданылған. Қатты тоналған қоршаулардан, негізінен, қыш үлгілері алынды. Балақұлболды-2 тобындағы 10-қоршаудан табылған адамның жамбас сүйегіне қадалып тұрған қоладан құйылған жебе ұшы — көне соғыс құралынан хабар берер дерек. Балақұлболды-3 тобындағы пішіні шаршылау (5,65 м, биікт. 1,1 м), тастан қаланған, ортасына тас ошақ, айнала биік сынтастар (менгирлер) орнатылған құрылыс — от жағып, діни ғұрыптар өткізетін арнаулы орын болған.