Барабарлық

Барабарлық — заттың, құбылыстың өзіне-өзі тең болуын немесе бірнеше заттың өзара теңдігін білдіретін философиялық ұғым. Барабарлықтың болмыстық негізі заттардың, құбылыстардың салыстырмалы тұрақтылығында және қасиеттерінің объективтік теңдігінде. Осының негізінде формальды логика тепе-теңдік заңын қолданады. Бұл заң бойынша әрбір ұғым, әрбір пікір белгілі бір мағынада ғана қолданылуы керек. Диалектикалық логика Барабарлық ұғымының шарттылығын ашып айқындайды. Материалдық дүние әрқашан өзгерісте, дамуда болатындықтан, заттар мен құбылыстар өзіне-өзі мәңгі тең болуы мүмкін емес. Әрбір зат өзіне-өзі тең ғана емес, оның сонымен қатар басқа зат болуға, өзгеріп дамуға іштей мүмкіндігі болады. Барабарлық ұғымы айырмашылық ұғымымен диалектіге байланыста болып, іштей қабысады. Дүниедегі тұрақтылық пен өзгерістің бірлігі — Барабарлық пен айырмашылықтың өзара қатынасының объективті негізі. Оларды бір-бірінен бөліп, жеке қарауға болмайды, олар өзара алмасып, ауысып отырады. Барабарлық уақытша, өткінші, ал оның өзгеруі — абсолютті, тынбайтын процесс.

Барабар