Бараба ойпаты
Бараба ойпаты (орысша - Барабинская низменность) - Батыс Сібірдің оңтүстігінде Обь-Ертіс су айырығында жатқан орманды жазық дала. Ресейдің Новосибирск және Омбы облыстары шегінде. Жері - 117 мың км²-ге жуық. Жер беті сәл көтерінкі келеді, абсолюттық биіктігі 100-150 м. Мұндағы орманның сұр топырағы мен қара топырақта әр түрлі шөпті шалғын және қайынды шоқ тоғай өседі. Бараба ойпатының оңтүстігінен онымен қатарласы өтетін жалдар арасындағы ойпаңдарға тұщы және тұзды көлдер (Чаны, Уба, Сартлан т.б.), сфагнум батпағы, сор және сортан жерлер, шалғынды жайылмалар бар. Бараба ойпаты - Батыс Сібірдің егіншілік пен сауын мал өсіру өркендеген аса маңызды ауданы. Батпақты құрғату, шабындықтардың құнарлығын арттыру мақсатында мелиорация жұмыстары жүргізілуде [1].
Дереккөздер өңдеу
- ↑ Қазақ Совет энциклопедиясы/Бас редакторы М.Қ.Қаратаев - Алматы, 1972, 2 том