Бейнеу қорымы

Бейнеу қорымы - 16 ғасырдан бастап сақталған архитектуралық ескерткіштер тобы.

Маңғыстау облысының Бейнеу кентінен оңтүстікке қарай 17 км жерде, Жем мен Сағыз өзендерінің сағасы арқылы Сарайшыққа өтетін тоғайлы керуен жолының бойында орналасқан. Бейнеу қорымын архитектор Т.Жанысбеков зерттеген. Екі терең сайдың арнасымен 3 бөлікке бәленген ауқымды қорым 800-ге тарта бейіт құрылыстарынан тұрады. Күмбезді бір бөлмелі қабірханалар, сағанатамдар мен құлпытас, қойтас, сандықтас бейнесіндегі шағын мемориалдық архитектуралық сәнді құрылыстар Арал-Каспий аймағына тән құрылыммен тұрғызылған. Сайдың түбінде жартастан кашалып Бекет ата жер асты мешіті салынған. Этнографиялық, көркемдік маңызы бар ескерткіштер тобына 3 күмбезді қабірхана, 5 сағанатам, 40-тан астам шағын бейіт кірелі. Бір бөлмелі, шағын күмбезді қабірханалар тас тақта мен қиылған әктастан дәстүрлі әдіспен қаланған. Төртбұрышты негізді арқалық желкендер арқылы күмбезге ұйқастыра қалап жіберуі сол кездегі құрылысшылардың шеберлігін көрсетеді. Қабірхана қасбетінің оңтүстік қабырғасы биіктетіліп тұрғызылған. Бейнеу қорымының көне оңтүстік-шығыс жақ бөлігіндегі биіктігі 110 м қоршаулар сағанатам құрылымының ерекшелігі болып табылады. Қорымда өңделген әрі ықшамдалған жабайы қой мүсіні - қошқартас сақталған.