Бетехтинит

Бетехтинит — сульфидтер класындағы минерал, академик А.Г. Бетехтиннің құрметіне осылай аталған. Химиялық формуласы (Cu, Ғе)₁₁(Pb, Ag)S₇. Ромбылық сингонияда кристалданып, ұзынша ине тәрізді кристалдар мен түйіршік масса құрайды. Қаттылығы 3,0, меншікті салмағы 6,13 — 6,14 г/см³, түсі қоңыр реңді қара, кейбіреулері күлгін реңді, болаттай сұр болып келеді. Бетехтинит мысты құмтастардың арасында және кентастық желілерде борнит, халькозин, саф күміс, кальцитпен бірге ұшырасады. Бетехтинит Қазақстанда ашылған сирек кездесетін жаңа минерал. Оны 1959 ж. қазақ ғалым-минералогы Т.А. Сәтбаева Жезқазған кен орнынан тұңғыш рет тауып, зерттеген. Кейінірек Майқайың алтын кен орнында табылды. 55 шахтадан табылған, салмағы 2 кг-ға жуық бетехтинит кристалы Жезқазған кен-металлургия комбинатының геологиялық музейінде сақтаулы тұр.