Брагулар — (өздік атауы — брагуй) — Пәкістанда (Белуджистан мен Синд), Иран мен Ауғанстанда, біразы Түрікменстанда тұратын халық. Жалпы саны 960 мың адам (1997). Еуропалық нәсілдің Жерортатеңізі тармағына жатады. Бірнеше диалектілерден тұратын дравид тілінде, урду, парсы, дари, араб тілдерінде сөйлейді. 20 ғасырлардың басында латын әліпбиін қолдана бастады. Негізгі ұстанатын діні ислам (сүнниттер). Брагулар этникалық құрылымына белудждар, күрдтер, ауғандар, джаттар, моңғолдар, арабтар кірген. Көпшілігі тау арасында тұрады, үлкен елді мекендер мен қалалардың болмауы олардың этникалық бірігуіне кедергі жасап, белудждарға, синхаларға сіңіп кетуіне соқтырған. Пәкістанда, тау және тау етегіндегі аймақтарда брагулар бидай, тары егумен, қой, ешкі, буйвол, жылқы, түйе өсірумен айналысады. Иран мен Ауғанстанда көшпелі өмір кешеді. Кедейлері ауыл шаруашылығы жұмыстарына жалданады. Пәкістанда төрт тайпалар одағы бар, тайпалар кландарға (таккары]), кландар руларға (фалли) бөлінеді, оларды вабдере (көсемдер) басқарады. Малшылар шатырларда тұрады. Орта дәрежелі брагулар шикі кірпіштен салынған үйлерде, кедейлер пальма жапырағымен жабылған лашықтарда тұрады. Ұлттық киімдері: ерлер ұзын көйлек пен шалбар, киіз қалпақ, сыртынан жеңсіз желет пен шекпен (шал) киеді. Аңыз әңгімелері мен батырлық эпостары көп.

Дереккөздер өңдеу

“Қазақ Энциклопедиясы”, ||-том