Бүйенқұрт

БҮЙЕНҚҰРТ (Chabertіosіs) — қой мен ешкінің ішек құрт ауруы. Ауруды тудыратын бүйенқұрт жұмырқұрт тобына жатады. Ұзындығы 20 мм-дей, ақ түсті келеді. Бүйенқұрт малдың тоқ ішегіне жабысып өмір сүреді. Ұрғашысы қой құмалағымен бірге сыртқа жұмыртқа бөліп шығарады да, одан балаң құрт пайда болады. Ол бірнеше күннен кейін жем-сумен бірге малға қайта түседі. Бүйенқұрт тоқ ішектің кілегей қабығына жабысып, оны қабындырады, малдың қанын сорады әрі ішекті жаралайды және зиянды микробтарға жол ашады. Ауру мал тышқақтап, оқтын-оқтын күшенеді, бірте-бірте шөп пен судан қалып, 3 — 4 күнде өледі. Емі: ауырған малға күніне бір рет не күн ара екі рет фенотиозин береді және ұзындығы 100 — 110 см резеңке түтікпен тоқ ішекке 1%-тік 1,5 л формалин ерітіндісін құяды. Аурудан сақтандыру үшін өрісті жиі ауыстырып, қораны мезгілінде көңнен тазартып және малға таза су беру керек. Көктем мен күзде малды профилактикалық мақсатта фенотиозинмен дәрілеу қажет.