Бүкілресейлік мұсылмандардың төртінші съезі

Бүкілресейлік Мұсылман Съезі, 1914 жылы 15 — 20 маусым аралығында Санкт-Петербургте Төртінші Мемлекеттік думадағы мұсылман фракциясының ұйымдастыруымен өткізілді. Съезд өткізу жөнінде мұсылман фракциясының төрағасы Қ.Тевкелев ішкі істер министрінен арнайы рұқсат алды. Б. м. с-не қатысқан 35 делегаттың 7-еуі қазақ халқының өкілдері болды. (Ә.Бөкейханов, Б.Қаратаев, С.Лапин, С.Шорманов, Ж.Сейдалин, Д.Аманшин, Ғ.Нарымбетов). Съездің күн тәртібіне мұсылмандардың діни істерінің жайы, бұл жөнінде Заң жобасын әзірлеу мәселесі қойылды. Съезде Қаратаев пен Лапин қазақтардың діни істерінің Орынбор мүфтилігінен шығарылып тасталуының басты себебі орыстандыру, шоқындыру саясатында жатқанын айтып, діни істерді жергілікті әкімш. қарамағынан алу керектігін ұсынды. Съезде “Ресей мұсылмандарының діни істері” туралы Заң жобасы әзірленді. Онда Санкт-Петербургте мұсылмандардың орталық діни басқармасын құру, қазақтардың діни істерін жергілікті әкімш. қарамағынан алу, оны Орынбор мүфтилігіне тапсыру, Түркістан өлкесінде өз алдына жеке мүфтилік ашу мәселелері қарастырылды. Бұл Заң жобасын Мемл. думаға енгізу үшін делегаттар тарапынан мұсылман фракциясына көмек көрсету керектігі атап өтілді.