Бүркітші дәнек

Бүркітші дәнек — шық-шөп тұқымдасының дәнек туысына жататын көп жылдық өсімдік. Іле өзенінің төменгі ағысындағы тұщы суларда немесе ағысы баяу сулардың бетінде қалқып өседі. Жіп тәріздес сабағының ұзындығы 5-15 см. Сағағы бірте-бірте кеңейе келеді де, оған дөңгелек пішінді 2 жақтауы бар жапырақтары 6-9-дан шоғырлана орналасады. Бүркітші дәнек — жәндіктермен қоректенетін өсімдік. Жапырақ сыртын өте сезгіш түктер жауып тұрады. Егер жапырақ үстіне ұсақ жәндіктер қонса, түктер оларды ұстап жабыла қалады. Ақ түсті гүлдері бір-бірден жапырақ қолтығына орналасады. Вегетативті (өсімді) жолмен көбейеді. Шілдеде гүлдейді, тамызда жеміс береді. Жемісі — ашылмалы қорапша. Бүркітші дәнек — өте сирек кездесетін өсімдік, қорғауға алынып, Казақстанның "Қызыл кітабына" енгізілген.