Валерий Хрищатый

Хрищатый Валерий (23.12. 1951, Алматы — 4.08.1993, Хантәңірі шыңы) — альпинист, КСРО-ның еңбек сіңірген спорт шебері (1982), АҚШ география қоғамының мүшесі. Бұрынғы Қазақ ауыл шаруашылық институтының топырақтану факултетін (1975) бітірген. КСРО-ның бірнеше мәрте чемпионы. 1980 ж. “Коммунизм” шыңына оңтүстік қапталынан көтерілген (7495 м). Қазақстандық альпинист Қ.Валиевпен бірге тұңғыш рет 1982 ж. жер бетіндегі ең биік Джомолунгма (Эверест) шыңына (8848 м) шықты. 1984 ж. “Жеңіс” шыңына (7050 м) солтүстік қабырға арқылы түнде көтерілді, 1986 ж. Самани шыңын қыста бағындырды. 1989 ж. Канченджанганы және биіктігі 8 мыңнан асатын 3 шыңға кислородсыз шықты, 1990 ж. “Жеңіс” шыңына қыста көтерілді. 1990 ж. Тянь-Шаньдағы “Жеңіс” шыңымен Хантәңірі аралығындағы 15 шыңды, 1991 ж. Гималайдағы Дхаулагири шыңын бағындырды. 1992 ж. Эверестке солтүстік шығыс жағынан, сол жылы Хантәңіріне қыста көтерілді. Бес дүркін “Қар барысы” атанған. Абсолюттік биіктігі 7 мың метрден асатын 39 шыңның басына шықты. Хрищатый “Халықтар достығы” орденімен (1982) және “Жеке ерлігі үшін” медалімен (1989) марапатталған.