Владимир Сергеевич Твердохлебов

Владимир Сергеевич Твердохлебов (18 мамыр 1937, Краснодар өлкесі, Ресей — 26 шілде 2022, Алматы, Қазақстан) — монументші-суретші, Қазақстан Республикасының еңбек сіңірген қайраткері (1996). Ленинград (қазіргі Санкт-Петербург) қаласындағы В.И. Мухина атындағы жоғары көркем-өнеркәсіп училещесін бітірген (1967). Сол жылдан Алматыда тұрып, монументті-сән өнері саласында шығармашылық еңбекпен айналысты. Қазақ КСР-і Орталық музейінің (1967–1968) және М.Әуезовтің әдеби-мемориалдық мұражай үйінің (1972) жаңа экспозициясы жобасын жасауға қатысты. Қарқаралы қаласындағы мәдениет үйі маңдайшасындағы мозаика композиция (1974) мен Ғалымдар үйі (Алматы) жанындағы “Шығыс күнтізбесі” деп аталатын әсем хауыздың (1978–1980), Ыстықкөлдегі Қазақстанның “Автомобилист” демалыс үйі үшін жасалған қондырғылы мозаикалар топтамасының (1986–1989) және Алматы облысының Молодежный поселкесіндегі Мәдениет сарайы көрермендер залының гобелен-шымылдығының (1990–1991) авторы. Ол Қазақстандағы ірі құрылыс ғимараттарына витраж, мозаика мен гобелендер жасап әзірлеуге, әсіресе, сәулет пен монументті өнерді өзара көркем шендестіру негіздерінің қалыптасуы мен өркендеуіне елеулі үлес қосты. Бұрынғы Алматы мақта-мата комбинатының мәдениет сарайы (1978–1982, қазіргі Орыс мемлекеттік академиясының балалар мен жасөспірімдер театры) және бұрынғы Қазақ КСР-і Ғылым Академиясының Ғалымдар үйі (1982–1984) ғимараттарын тұтас көркемдеп безендіру ісінің бас суретшісі болған. Твердохлебов табиғат көрінісі тақырыбындағы қондырғылы кескіндеме (“Күзгі күн”, 1968; “Жетісу құм дөңдері”, 1995; “Ескі медресе ауласы. Хиуа қалысы”, 1997; “Тон көрінісі. Ыстықкөл”, 1999; “Жусан иісі”, 2000; “Ыстықкөлдегі ферма”, 2001), плакат пен акварель саласында да жемісті еңбек етті. Суретшінің туындылары кезінде республикалық, бүкілодақтық және халықаралық көрмелерге қойылып, көрермендер назарына ұсынылды. Твердохлебовтың бірқатар еңбектері Қазақстан, Ресей, АҚШ, Канада, Англия, Италия, Бельгия мен Голландияның жеке қорларында сақтаулы. 1970–1975 жылдары плакаттар топтамасы үшін Бүкілодақтық байқаудың 1, 2 және 3-дәрежелі дипломдарымен марапатталды.

Владимир Твердохлебов
Владимир Сергеевич Твердохлебов
Туған күні	18 мамыр 1937 (1937-05-18)
Туған жері	Краснодар өлкесі, Ресей
Қайтыс болған күні	26 шілде 2022 (2022-07-26) (85 жас)
Қайтыс болған жері	Алматы, Қазақстан
Мектебі	В.Мухина атындағы Ленинград Жоғары сурет-өнеркәсіптік училищесі (1967)
Сайты	tverdokhlebovsgallery.com