Гидроидтар

Гидроидтар, гидроидтылар (Hydroida) – ішекқуыстылар типінің гидрозоялар класына жататын су жәндіктері. Гидроидтардың 5 – 6 отрядқа бөлінетін 4000-ға жуық түрі белгілі, соның ішінде Қазақстанда Каспий теңізінде 5 түрі, Арал теңізінде 1 түрі анықталған. Олар негізінен теңізде (гидра тұщы суда), кейбір түрлері көлде (Африкада), өзенде (Солт. Америкада, Еуропада және Азияда) тіршілік етеді. Гидроидтардың жыныссыз көбейетін ұрпағы – полиптер, жынысты көбейетін ұрпағы медузамен алмасып отырады. Полиптер су түбіндегі тастарға бекініп, ағаш тәрізді бұтақтанып, бүршіктеніп өсіп шоғыр (колония) құрайды. Шоғырдың жеке дарабастарын гидранттар деп атайды. Шоғырдың сыртқы қабаты, судағы көмір қышқыл газы сіңгендіктен, қатайып, кемеге қауіпті рифтер түзеді. Кейбір бүршіктерден дара жынысты медуза дамып, шоғырдан бөлек тіршілік етеді. Бұлардың жұмыртқасынан шыққан дернәсілі планула деп аталады, оның денесі кірпікшелермен қапталған. Гидроидтар – жыртқыштар. Олар планктонды, шаянтәрізділерді, кейбір жәндіктердің судағы дернәсілін, шабақтарды қармалауыштарынан шығатын уымен әлсіретіп ұстап қоректенеді. Кейбір үлкен медузалардың уы адам денесіне қауіпті жара түсіреді.

Гидроидтар