Гүлсамал Төрединқызы Аймаханова

Гүлсамал Төрединқызы Аймаханова (21.11.1961. Ақтөбе облысы, Шалқар ауданы) - Жазушылар одағының мүшесі, ақын, сазгер, аудармашы, Қазақстан Республикасы Мәдениет және ақпарат министрлігінің «Мәдениет саласының үздігі», тележурналист.

Еңбек жолы

1979 жылы орта мектепті, 1985 жылы әл-Фараби атындағы Қазақ Ұлттық университетінің журналистика факультетін тәмамдаған. Еңбек жолын 1985-88 жж. "Алға" және "Мұғалжар" аудандық газеттерінде тілші ретінде бастап, 1988-89 жж. даңқты батыр Әлия Молдағұлова мұражайының ғылыми қызметкері болды.

Ақтөбе облыстық телерадио компаниясында редактор қызметін атқарды, 40 жылдай тарихы бар облыстық радио жабылып, келесі жылдары баспасөздің түрлі саласында тер төкті. 1994 жылы Ақтөбе қалалық мәслихатына депутат болып сайланған. 1996 жылы Ақтөбе облысы теледидарының 35 жылдығына байланысты ҚР Мәдениетінің Құрмет грамотасымен марапатталған. 2001 жылдары "Ақтөбе" энциклопедиясының ғылыми қызметкері болып, аймақ тарихының жинақталуына атсалысты. 2002-2004 жж. өңірде ислам дінінің өркен жайып, ұлттық құндылықтардың жаңғырып-түлеуінің жаршысы ретінде өмірге келген тәуелсіз «Нұр-Дәулет» газетінің бас редакторы қызметін атқарды. 2004-2005 жж. Еуропалық одақтың облыстық "АСМЕД" жобасында жұртшылықпен байланыс жөніндегі сарапшы болып қызмет етті. 2005 жылы «AdvanceService» орталығында аудармашы, республикалық педагогикалық басылымдардың тілшісі болды. Қазір аударма ісімен айналысады.

Шығармашылығы

• Ең алғаш өлеңдері жас ақындардың «Мерейлі мекен» жинағына енгізілген (республикалық «Жалын» баспасы, 1992).

Тұңғыш Жыр кітабы «Көкемарал» 2000 ж.

• Алматыда «Отырар» баспасынан асылдың сынығы, көрнекті ғалым Е.Қ.Жұбановтың «Поэзия самалы тербеген жыр гүлдері» деген алғысөзімен жарық көрді.
• «Көкемарал» кітабын ақын Е.Дүйсенбайұлы «Жарық дүниеге құштарлық пен іңкәрлік жыры» (29.01.01) деп бағаласа, М.Құрманалин «Абыз ақын тілегін» (21.11.08) арнады.
• «Еңлікгүл» атты екінші Жыр жинағы 2008ж. республикалық «Сардар» баспасынан Қазақстанның Халық жазушысы Т.Молдағалиевтің «Жырың көрікті болсын!» деген батасымен шықты.
• Есімі мен шығармалары: 2005ж. – Ақтөбе өңірінің «Жәдігер» әдеби Антологиясына, «Әлия-80» кітабына; 2009ж. – «Қазақ телевизиясы» және «Шалқар» Энциклопедияларына, «Қазақстан Жазушылары» Анықтамалығына, 2012ж. – «Шалқар ауданына – 80 жыл» кітабына, т.б. жинақтарға енгізілген.

Дереккөздер

• http://adebiportal.kz/kz/authors/view/1165
• http://kazradio.kaztrk.kz/ru/archive/programs/almaty-studiasy/kalamger-poezia/65625