Әбу Досмұхамбетов

Әбу Досмұхамбетов (1920, Солтүстік Қазақстан облысы, Уәлиханов ауданы, Үшкөл ауылы - 05.10.1943, Украина, Киев облысы, Чернобыль қаласы) - 2-дүниежүзілік соғысқа қатысушы, ага лейтенант, атқыштар ротасының командирі. Қазақстанда 7-сыныпты бітірген соң Қорған облысы,Петухов ауданы,Чебачье селосында тұрған. «Жаңа жол» мал фермасының меңгерушісі болды. 1939 жылдың қыркүйегінде Досмұхамбетов Кеңес әскері қатарына шақырылып, ондағы полк мектебін үздік бітіріп, лейтенант атағын алды. Досмұхамбетов Киев қаласынан (Украина) солтүстікке қарай Днепр өзенінен өту кезінде айрықша көзге түсті. 1943 жылғы қыркүйек айының соңында 8-атқыштар дивизиясының 1-атқыштар ротасы Припять сағасынан солтүстікке қарай Днепрге жеткен. Досмұхамбетов ротасымен шабуылға шығып, жауды кері шегінуге мәжбүр етті. Досмұхамбетов 5 қазанда ерлікпен қаза тапты. Көрсеткен батылдығы үшін Досмұхамбетовке КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (16.10.1943). Чернобыль қаласының саябағында Досмұхамбетовке бюст орнатылған.