Ермұханбет Омарұлы Омаров

Ермұханбет Омарұлы Омаров (1950 жылы 1 қаңтарда Алматы облысы Талғар ауданы Шеңгелді ауылында туған) - мемлекеттік қайраткер. Қазақ.

Ермұханбет Омарұлы Омаров

Әкесі - Халықов Омар, марқұм, ҰОС қатысқан. Анасы -Халықова Жәмигүл, марқұм.

Қазақ Еңбек Қызыл Ту орденді ауыл шаруашылық институтының агрономдық факультетін бітірген (1976), ғалым агроном. Ауылшаруашылық ғылымдарының кандидаты (2006). Кандидаттық диссертациясының тақырыбы: «Қазақстанның Жаркент шатқалында қант қызылшасының көшірілмейтін дәнін себудің уақыты мен тәсілдері».

«Жерұйық өлке» кітабының авторы (2003).

«Нұр Отан» ХДП мүшесі (2004-2009).

1968-1970 жылдары - Кеңес әскерінің қатарында қызметте. 1971 жылдың қаңтар айынан - Алматы автожөндеу зауытының слесарі. 1971 жылдың қыркүйек айынан - Қазақ Еңбек Қызыл Ту орденді ауыл шаруашылық институтының студенті. 1976 жылдан - Алматы облысы Еңбекшіқазақ ауданы Балтабай темекі кеңшарының бригадирі, аға агрономы, бөлім бастығы. 1981 жылдан - Алматы облысы Еңбекшіқазақ ауданы Балтабай ауылының халық депутаттары кеңесі аудандық атқару комитетінің төрағасы. 1985 жылдан - Алматы облысы Еңбекшіқазақ ауданы «Талғар» кеңшары партия комитетінің хатшысы. 1986 жылдан - Қазақстан Компартиясы Алматы облыстық партия комитетінің нұсқаушысы, ауылшаруашылығы және азық-түлік өндірісі бөлімі меңгерушісінің орынбасары. 1990 жылдан - Алматы облысы Агроөндіріс комитетінің өндіріс басқармасы төрағасының бірінші орынбасары. 1992 жылдан - Алматы облыстық әкімшілігінің жер қатынастары және жер құрылысы комитетінің төрағасы. 1996 жылдан - Алматы облысы әкімінің орынбасары. 1998 жылдан - Алматы облысы Панфилов ауданының әкімі. 2004 жылдан - ҚР Парламенті Мәжілісі 3-ші шақырылымының депутаты, Аграрлық мәселелер комитетінің мүшесі.

2007 жылдан бері - ҚР Парламенті Мәжілісі 4-ші шақырылымының «Нұр Отан» ХДП тізімі бойынша депутаты, Халықаралық істер, қорғаныс және қауіпсіздік комитетінің мүшесі.

«Астана» (1998), «Қазақстан Республикасының тәуелсіздігіне 10 жыл» (2001), «Қазақстан Конституциясына 10 жыл» (2005), «Тыңға 50 жыл» (2006), «Қазақстан Парламентіне 10 жыл» (2006), «Астанаға 10 жыл» (2008) медальдарымен марапатталған.

Әскери атағы - запастағы подполковник.

Үйленген. Жұбайы - Омарова Бижамал Асылханқызы (1955 жылы туған), инженер-технолог болып жұмыс істеген. Қызы -Динара (1979 жылы туған), қаржыгер; ұлы - Дәурен (1982 жылы туған), қаржыгер.