Жеміс шірігі

Жеміс шірігі, монилиоз — жеміс ағаштарының ауруы. Бұл ауруды Monіlіa туысына жататын саңырауқұлақтар тудырады. Ауру жемістің солуымен, шіруімен сипатталады. Алма мен алмұрттың жеміс шірігін Monіlіa fructіgena саңырауқұлағы тудырады. Жеміс шірігін тудыратын саңырауқұлақтар өсімдік механикалық зақымданғанда ұлпасына өтіп дамиды. Жемісте алдымен дөңгелек, қоңырқай сұр дақтар пайда болады. Жеміс шірігі 1 — 2 аптаның ішінде бүкіл жемісті қамтиды. Қарайған жемістер кейде ағаш басында қалып қояды. Ауа райы ылғалды кезде ауруға шалдыққан жемісте ауру қоздырғышының мицеллиі мен спораларынан тұратын, шеңбер бойына орналасқан сарғылт күлгін өңез пайда болады. Бұл — монилиозды шіріктің басқа жеміс шіріктерінен негізгі айырмашылығы. Сонымен қатар сүйек жемісті және шекілдеуік дақылдардың жеміс шірігі кең таралған. Сүйек жемісті дақылдардың жеміс шірігі (қоздырғышы Monіlіa cіnerea) — өрік, шабдалы, алхоры, шие, қызыл шиелердің зиянды аурулары. Қыста сақтау кезінде алма мен алмұрт жемістері Penіcіllum саңырауқұлағы қоздыратын ойыс шірікке жиі шалдығады. Бұл кезде жемісте кішкене дөңгелек ойыс дақтар пайда болады. Жеміс дәмі жағымсыз болып, жеуге жарамайды. Сонымен қатар жемістер бактериялар қоздыратын сулы шірікке шалдығады. Жеміс шіріп, қоймалжың сұйыққа айналады. Сайда орналасқан, тығыз отырғызылған, бөрікбасы қалың бақша ағаштары ауруға көп шалдығады. Сондықтан жеміс ағаштарын мезгілімен кесіп, фунгицидтермен бүркіп, ауру бұтақтарын алып тастап, жемістерін зақымдамай жинау қажет.

Монилиозға шалдыққан алма

Тағы қараңыз

• Жеміс-жидек шаруашылығы