Жоғары температуралы реактор

Жоғары температуралы реактор – активті зонасының температурасы едәуір жоғары (700°С-тай) энергетикалық ядролық реактор. Термин шартты түрде алынған, негізінен қазіргі энергетикалық реакторлардың барлығы – жоғары температуралы. Жоғары температуралы реакторлы атом қондырғыларының пайдалы әрекет коэффициенті едәуір жоғары болады. Жоғары температуралы реакторды жасау – энергетикалық реактор жасауда келешегі бар бағыт; ол төте цикл бойынша жұмыс істейтін (Мысалы, газ турбинасында) реактор жасауға мүмкіндік береді. Жоғары температуралы реакторды, әдетте, графитті-газды реактор деп атайды. Графитті-газды реактор – нейтрон баяулатқыш ретінде графит, ал жылу тасымалдағыш ретінде газ (көміртегі диоксиді, гелий) қолданылатын жылулық нейтронды ядролық реактор. Газ-жылу тасымалдағышының жоғары температураға дейін қыза алатын мүмкіндігі графитті-газды реакторлы АЭС-тің пайдалы әрекет коэффициентін 40%-ке дейін және одан да жоғары көтеруге мүмкіндік береді. Графитті-газды реактор плутоний өндіруге, энергетикалық мақсатта, т.б. қолданылады.

Дереккөздер:

Қазақ ұлттық энциклопедиясы