Жылгелді Теңізбайұлы

Жылгелді Теңізбайұлы (1855, қазіргі Маңғыстау ауданы Шайыр ауылының маңындағы Сары ой мекені – 1938, Түрікменстандағы Қулы-Маяк) – әнші, ақын, жыршы, күйші, «адайдың жеті қайқысының» бірі. Жылгелді жастайынан-ақ ауыл, ел арасындағы той-жиындарда қара домбырасын тастамай, өз бойындағы сан алуан өнерін (әншілік, жыршылық, домбырашылық, ақындық, т.б.) көрсеткен. Ел басына туған зобалаң, қиын кезең (1930 – 31) Жылгелдінің үй-ішімен Шағадамға (қазіргі Түрікменстан, Қулы-Маяк кәсіпшілік аймағы) қоныс тебуіне мәжбүр етеді. Оның кейінгі ұрпаққа жеткен мұрасы – «Құнан нар», «Дәурен-ай», «Ақзер», «Ағибаш», «Сағыныш» (яғни «Дауысым, саған не болды») әндері, «Жұт итке» деген толғауы (150 жолдай). Облысы мәдениет басқармасы шығарған «Маңғыстау әуендері» атты жинақта (1994) Жылгелдінің «Құнан нар» атты бір әні нотасымен жарық көрді.