Жүнісхан Бүркітбайұлы

Жүнісхан Бүркітбайұлы (1896-1926) - ақын. Абайдың ақындық мектебінен үлгі алған шәкірттерінің бірі. Жүнісхан 9 жасынан өлең шығарып, елге танылады. Балалық шағы көбінесе өз атажұртымен іргелес Абай ауылында, Көкбай тәрбиесінде өтеді де, Ұлы ақынның талантты және атақты шәкірттері Әріп Тәңірбергенов, Уәйіс, Иманбазар, Әубәкірлердің ақындық өнерінен үлгі-өнеге алып өседі.

Жүнісхан жастайынан өлең-жырды, ән мен жырды серік етіп, ел арасындағы ақындар айтысына қатысады. Нағашысы Көкбаймен, Еркөкше Кекеұлы, Иманбазар Қазанғапұлы, Жанбатырмен айтыстарында сөз өнеріне дес бермейді. Ол өлеңді ауызша да, жазбаша да шығарған. «Бай кеткен соң бәйбіше», «Құнанбай атаң болса, құдай емес», «Николай патшаға», «Маңтөбет» атты өлеңдерінде Абайға ұқсап әлеуметтік мәселелерге бой ұрып, озбыр заманның әділетсіздік жақтарын сынға алса, «Мәшкеге», «Менің атым-Жүнісхан» т. б. өлеңдерінде кіршіксіз махаббат, әйел теңдігін жырлайды. «Қайран, елім» атты өлең арқылы 16 жылғы ұлт-азаттық көтеріліске батыл үн қосады.