Иван Гаврилович Малин

Иван Гаврилович Малин(6.7.1897, Ресей, Брянск облысы,Брянск қаласы -18.12.1966, Саратов облысы) - 2-дүниежүзілік соғысқа қатысушы, барлаушы, гвардия старшинасы. 1918-20 жылы Азамат соғысы мен 1930 жылы ұжымшарлар ұйымдастыруға, ал соғыс қарсаңында Шығыс Қазақстанда әуежай кұрылысын салуға қатысқан. Ұлы Отан соғысының алғашқы жылдарында Алматы облысы,Кербұлақ ауданы,Киров кеңшарын (қазіргі Алтынемел ауылы) басқарды. 1942 жылы майданға аттанып, Сталинград, Орталық, 1-Украина майдандарында ұрыстарға қатысты. Днепрден өтуде көрсеткен ерекше ерлігі үшін Малинге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (16.10.1943). Соғыстан кейін туған кеңшарына оралып, партия ұйымын басқарды. Ленин орденімен, бірнеше медальдармен марапатталған.