Ингрессия

Ингрессия (латынша: іngressіo – ену) – су деңгейінің көтерілуінен немесе жағалаудың төмендеуінен теңіз суының құрлық жағалауындағы ойыс жерлерге енуі.

Ингрессияның теңіз жағалауларындағы аса таралған көріністері – шығанақтар мен қойнаулар. Олар, көбінесе, порт, айлақ жасауға, кеме тоқтатуға қолайлы. Жағалаудағы жер бедерінің ерекшеліктеріне қарай (таулы, тегіс, жазықты, ойпатты) ингрессиялық жағалаулар алуан түрлі болады. Олардың пайда болуына байланысты: гляциальдік (фьорд, шхер), флювиальдік (риас, лиман), эолдық (Арал теңізі), денудациалық болып бөлінеді. Мұндай құбылыс Қазақстан жерінде Каспий теңіз жағалауында кең орын алған.