Исландия — Қазақстан қатынастары

Исландия — Қазақстан қатынастары — Қазақстан Республикасы мен Исландия арасындағы қатынастар

Жалпы мәліметтер

2004 жылғы 14 мамырда Нью-Йоркте Бірлескен коммюникеге қол қою арқылы екі ел арасында дипломатиялық қатынастар орнатылды;

2017 жылғы 15 ақпаннан бастап Ерлан Ыдырысов (Лондон қаласындағы резиденциясымен) Қазақстан Республикасының Ұлыбритания және Солтүстік Ирландия Біріккен Корольдігіндегі Төтенше және Өкілетті Елшісі болып табылады. 2017 жылғы 8 тамыздан бастап Ерлан Ыдырысов Қазақстанның Исландия мен Ирландиядағы Елшісі қызметін қоса атқарушы болып тағайындалды.

2020 жылдан бастап Исландияның Қазақстандағы Төтенше және Өкілетті Елшісі Арни Тор Сигурдссон (Мәскеуде резиденциясымен) болып табылады.    

Саяси қарым-қатынастар

Осы уақытқа дейін Қазақстан мен Исландия арасында мемлекет, үкімет басшылары, сондай-ақ сыртқы саяси ведомстволар басшылары деңгейінде ресми сапарлармен алмасулар жүргізілген жоқ.

Алайда, халықаралық ұйымдар, атап айтқанда БҰҰ және ЕҚЫҰ аясындағы байланыстар сақталуда.

Құқықтық - келісім-шарт базасы

ҚР Ұлыбританиядағы Елшілігі сауда-экономикалық салада базалық келісімдер жасасу мәселесін бірнеше рет көтерді:

1. Инвестицияларды көтермелеу және өзара қорғау туралы келісім;
2. Қосарланған салық салуды болдырмау туралы келісім;
3. Азаматтық авиация саласындағы келісім.

Алғашқы екі келісім бойынша, ҚР Инвестиция және даму министрлігі мен ҚР Қаржы министрлігі аталған келісімдердің инвестицияның болмауына және екі ел арасындағы тауар айналымының төмен деңгейіне байланысты жасалуының мүдделі еместігі туралы хабарлады.

Сауда-экономикалық қарым-қатынастар

Қазақстан мен Исландия арасындағы тауар айналымы қазақстандық сыртқы сауда статистикасында дәстүрлі түрде ең аз үлесті құрайды. ҚР Стратегиялық жоспарлау және реформалар жөніндегі агенттігінің Ұлттық статистика бюросының деректеріне сәйкес, 2021 жылғы Қазақстан-Исландия тауар айналымы 7,6 млн. АҚШ долларын құрады.

2021 жылдан бастап «Arctic Green Energy» компаниясының вице-президенті Сигурдур Атли Йонссон мырза Рейкьявик қаласындағы консулдық округімен Қазақстан Республикасының Исландиядағы Құрметті консулы болып табылады.

2021 жылғы қазанда ҚР Ұлыбританиядағы Елшілігі Исландия СІМ-не дипломатиялық және қызметтік паспорттардың иелері үшін ҚР мен Исландия арасында визасыз режим туралы келісім жасау ұсынысы бойынша нота жолдады. Бұл ұсынысты Исландия Үкіметі қарауда.

2021 ж. 29-30 қарашада ҚР Елшілік қызметкерлері Исландияның Сыртқы істер министрлігінде келіссөздер жүргізу, іскер топтармен кездесулер, ҚР азаматтарын қабылдау, ҚР Туын және басқа да атрибуттарды, ақпараттық материалдар мен кітаптарды Исландиядағы жаңадан тағайындалған ҚР Құрметті Консулы А.Йонссонға беру үшін Исландияға сапармен барды.

Исландия СІМ өкілдерімен кездесу барысында Елшілік қызметкерлері Дипломатиялық және қызметтік паспорттардың иелері үшін визасыз келісім жасасу туралы, сондай-ақ Қосарланған салық салуды болдырмау туралы, Инвестицияларды өзара қорғау және әуе қызметтері туралы келісімдерге қол қою мүмкіндігі, жаңартылатын энергетика, туризм саласындағы өзара іс-қимыл, спортты дамыту саласында тәжірибе алмасу мәселелерін талқылады. Кездесу қорытындысы бойынша тараптар жоғарыда аталған мәселелер бойынша бірлесіп жұмыс істеуге келісті.

Сонымен қатар, Дүниежүзілік банктің Қазақстанның геотермалды энергетикасын дамыту туралы баяндамасын дайындауға қатысқан жұмыс тобының сарапшыларымен кездесу өтті. Кездесуде зерттеу нәтижелері туралы презентация, сондай-ақ геотермалды энергетиканы дамыту үшін қажетті заңнамаға өзгерістер енгізу туралы Қазақстанға ұсынымдар ұсынылды.

Бұдан басқа, ҚР Елшілік қызметкерлерінің Исландияға сапары барысында «Arctic Green Energy» компаниясының және Исландия сауда палатасының басшыларымен кездесу өтті. «Arctic Green Energy» басшылығымен кездесуде компания қолданатын көмірқышқыл газын минералдандыру технологиясы талқыланды. Өз кезегінде Исландия сауда палатасында екіжақты іскерлік байланыстарды жолға қою келешегі талқыланды.

Елшілік қызметкерлері «ON Power» геотермалды электр станциясына барып, онда станцияда кеңінен қолданылатын көмірқышқыл газын минералдандыру технологиясымен танысты.