Келімберді

Келімберді – қазақ халқының құрамындағы ру, Кіші жүз құрамындағы Байұлы тайпасына енетін Адай руының бір тармағы. Шежіре деректеріне қарағанда, Келімбердіден Ырысқұл-Құнанорыс (Жанбай, Жантуған), Ақпан (Қаракүшік, Қармыс, Сармыс), Шыбынтай (Өртілес, Қоршы-Жүйрік), Тобыш (Ораз, Бегей, Көпес) және Мұңал (Алақұнан, Әли, Бәйімбет, Шоғы-Қырықмылтық, Жаулы) ұрпақтары тарайды. Келімберді ұрпақтары төңкеріске дейін Маңғыстауды, Гурьев уезі мен Бөкей ордасын қоныстанған. Маңғыстау мен Үстіртті, Каспий теңізінің солтүстік жағалауын қыстап, Ембі, Ойыл, Қобда өзендерінің бойын, Мұғалжар тауының бөктерлерін жайлаған.