Клим Тимофеевич Клиновицкий

Клим Тимофеевич Клиновицкий(1924, Шығыс Қазақстан облысы,Глубокое ауданы,Кіші Үлбі ауылы - 26.7.1944, Польша, Красник қаласының маңы, Вильколаз ауылы) - 2-дүниежүзілік соғысқа катысушы, гвардиялық сержант, пулемет расчетінің командирі. Соғысқа дейін ұжымшарда жұмыс істеген. Кеңес әскері қатарына 1942 жылы шақырылды. 52-гвардиялық кавалериялық полкте (1-Беларусь майданы, 7-гвардиялық корпус, 14-гвардиялық кавалериялық дивизия) ұрыстарға қатысты. 1944 жылдың 26 шілдесінде Вильколаз ауылы маңындағы ұрыста (Красник қаласы, Польша) Клиновицкий пулемет оғын боратып, эскадронның қоршаудан шығуына көмектесті және жаудың 2 шабуылына тойтарыс берді. Жараланған Клиновицкий танкіге қарсы гранатамен жау танкісін жойды. Клиновицкийге осы ерлігі үшін КСРО Жоғарғы Кеңесі Төралқасының Жарлығымен қаза болғаннан кейін Кеңес Одағының Батыры атағы берілді (24. 3.1945). Сондай-ақ ол Ленин орденімен марапатталды. Өзінің туған жері Кіші Үлбі ауылында батырдың есімімен көше аталады.